کراچی۔ آئی ایم ایف پروگرام میں جانے کے بعد ڈالر کی پرواز کو پر لگ گئے تھے مگر حکومتی مداخلت کے بعد ڈالر کی قیمت وقتی طور پر تھم گئی تھی۔ حکومتی معاشی ٹیم کا کہنا تھا کہ ڈالر کی قیمت اب ایک سو پچپن چھپن کے درمیان مستحکم ہو جائے گی مگر اب پھر ڈالر نے آہستہ آہستہ رنگ دکھانا شروع کر دیا ہے۔ آج انٹربنک ڈالر ایک روپے 11 پیسے بڑھ گیا جبکہ اوپن مارکیٹ میں 75 فیصد پیسے مہنگا ہو گیا۔

انٹربنک آج 159 روپے 90 پیسے پر ڈالر ٹریڈ ہوا

انٹربنک آج 159 روپے 90 پیسے پر ڈالر ٹریڈ ہوا جبکہ اوپن مارکیٹ میں ڈالر 75 پیسے مہنگا ہو کر 160 روپے 50 پیسے پر فروخت ہوا۔ دوسری جانب سٹاک مارکیٹ میں بھی آج کمی کا رجحان رہا۔ کاروباری لین دین کے دوران 663 پوائنٹس کی کمی ہوئی اور 100 انڈیکس 33 ہزار 8 پوائنٹس کی سطح پر آ گیا۔

معیشت دانوں کا کہنا ہے کہ پاکستانی کرنسی میں کمی کا رجحان ملک میں معاشی سرگرمیوں میں حالیہ تعطل کے پیش نظر ہو سکتا ہے۔ بھاری ٹیکس عائد کئے جانے کے سبب تاجر اور صنعت کار سراپا احتجاج ہیں۔ دوسری جانب حکومت مسائل حل کرنے میں غیر ضروری تاخیر کر رہی ہے جس سے ملکی معاشی صورتحال مزید گھمبیر ہو رہی ہے۔