اسلام آباد۔ پاک چین دوستی کو سمندروں کی گہرائیوں اور ہمالیہ کی بلندیوں سے اونچا کہا جاتا ہے۔ یہ دوستی ہمیشہ مشکل کی ہر گھڑی میں آزمائش پر پورا اتری ہے۔ سی پیک منصوبہ بھی پاک چین دوستی کی درخشاں علامت کہا جاتا ہے جو نہ صرف چین کیلئے ایک اہم منصوبہ ہے بلکہ پاکستان کی معاشی ابتری کے خاتمے میں گیم چینجر ہو گا۔

پاک چین بزنس کونسل بنانے کا فیصلہ کیا ہے

اس عظیم الشان منصوبے کا پہلا مرحلہ مکمل ہو چکا ہے۔ اب وفاقی وزیر منصوبہ بندی خسرو بختیار نے کہا ہے کہ سی پیک کا دوسرا مرحلہ شروع کر رہے ہیں۔ انہوں نے مزید کہا کہ سی پیک کے موجودہ ڈھانچے میں تبدیلی لائیں گے اور اس عظیم منصوبے کیلئے سی پی اتھارٹی قائم کریں گے۔ وہ اسلام آباد میں ایک پریس کانفرنس سے خطاب کر رہے تھے۔

چار سال سے گوادر پر کوئی پیش رفت نہیں ہو سکی

انہوں نے کہا کہ حکومت سی پیک کے جاری معاہدوں پر عمل کر رہی ہے۔ پاک چین بزنس کونسل بنانے کا فیصلہ کیا ہے۔ انہوں نے کہا کہ بدقسمتی سے چار سال سے گوادر پر کوئی پیش رفت نہیں ہو سکی۔ گوادر ماسٹر پلان آخری مراحل میں ہے۔ انہوں نے مزید کہا کہ سی پیک کے تحت تمام منصوبے مکمل کریں گے۔ سات دہائیوں سے ریلوے کا نظام فرسودہ ہو چکا ہے۔

ہماری توجہ ایم ایل ون منصوبہ پر ہے۔ ریلوے کے نظام کو اپ گریڈ کریں گے۔ ایم ایل ون کو تین مراحل میں مکمل کریں گے۔ پی پیک کے اہداف کے حصول کیلئے نجی شراکت داری ضروری ہے۔ سی پیک اتھارٹی کے قیام کیلئے بل پارلیمنٹ میں لا رہے ہیں۔ دوسرے مرحلے میں صنعت و زراعت کے شعبوں میں تعاون شامل ہے۔