اسلام آباد۔ ہمارے ہاں پرکشش عہدوں کو ازخود چھوڑ نے کی روایت موجود نہیں ہے۔ ورنہ چیئرمین سینیٹ صادق سجرانی کو مستعفی ہو جانا چاہئے تھا۔ سابق صدر آصف زرداری کی حمایت سے چیئرمین سینیٹ کے عہدے پر براجمان ہونیوالے صادق سنجرانی اب پی پی کی حمایت کھو چکے ہیں۔ اب اپوزیشن اتحاد کے پاس دوتہائی سینیٹرز ہیں۔ آل پارٹیز کانفرنس میں اپوزیشن نے چیئرمین سینیٹ کی تبدیلی پر اتفاق کیا تھا۔

ایوان کے اندر جمہوریت پر حملے ہو رہے ہیں

اب چیئرمین پی پی بلاول بھٹو زرداری نے بھی صادق سنجرانی سے خود مستعفی ہونے کا مطالبہ کیا ہے۔ اسلام آباد میں ایک پریس کانفرنس سے خطاب کرتے ہوئے بلاول نے کہا کہ اپوزیشن کے اتفاق رائے سے چیئرمین سینیٹ لانا چاہتے ہیں۔ اگر اپوزیشن کا متفقہ امیدوار چیئرمین سینیٹ بنا تو ہماری جیت ہو گی۔ ان کا مزید کہا تھا کہ پارلیمان چلانا کرکٹ میچ نہیں۔ ایوان کے اندر جمہوریت پر حملے ہو رہے ہیں۔

سنجرانی کو ہم اتفاق رائے سے لے کر آئے تھے لیکن اب صورتحال مختلف ہے

قائمہ کمیٹیوں کے اجلاس منسوخ کرنا پارلیمنٹ پر حملہ ہے۔ قانون کے تحت سپیکر ہم پر ایسی پابندی نہیں لگا سکتے۔ جمہوریت پسند لوگوں کودیوار سے لگائیں گے تو انارکی پھیلے گی۔ انہوں نے مزید کہا کہ صادق سنجرانی کو ہم اتفاق رائے سے لے کر آئے تھے لیکن اب صورتحال مختلف ہے۔ اب اپوزیشن اور حکومت کسی اور پاس ہے۔ صادق سنجرانی کو خود ہی مستعفی ہو جانا چاہئے۔

عوام دشمن بجٹ کو دھاندلی سے پاس کرایا گیا

ہم نے حکومت کو پارلیمان میں معاشی صورتحال پر تعاون کی پیش کش کی لیکن ہماری بات نہیں مانی گئی۔ عوام دشمن بجٹ کو دھاندلی سے پاس کرایا گیا۔ ملکی معاشی صورتحال بد سے بدتر ہوتی جا رہی ہے۔ احتساب عدالت کے جج کی مبینہ ویڈیو کے بارے میں میڈیا سے گفتگو کرتے ہوئے انہوں نے کہا کہ اعلٰی عدلیہ کو اس کا نوٹس لینا چاہئے کہ فیصلہ کہیں دباؤ کی وجہ سے تو نہیں ہوا؟