اسلام آباد۔ چیف جسٹس آف پاکستان آصف سعید کھوسہ ماڈل کورٹس کا کامیاب تجربہ کر کے ایک نئی مثال قائم کر رہے ہیں۔ ان کا کہنا ہے کہ ہمیں سب سےپہلے اپنے گھر کو ٹھیک کرنا ہے۔ اب قومی احتساب بیورو کو بھی دوران سماعت سخت ریمارکس دیتے ہوئے کہا کہ وہ ہر کام سپریم کورٹ سے کیوں کروانا چاہتا ہے۔ ایڈیشنل کلکٹر انکم ٹیکس لاہور محمد اقبال کی بریت کیخلاف نیب اپیل کی سماعت کے دوران چیف جسٹس نے یہ ریمارکس دئیے۔

محمد اقبال نے چھ بے نامی جائیدادیں خریدیں اور آگے بیچ دیں

عدالت عظمٰی نے اپنے فیصلے میں کہا کہ استغاثہ اپنا الزام ثابت کرنے میں ناکام رہا ہے۔ اگر ملزم کے خلاف کوئی اور کیس ہے تو نیب اپنی تحقیقات جاری رکھے۔ نیب پراسیکیوٹر نے اپنے دلائل میں کہا کہ محمد اقبال نے چھ بے نامی جائیدادیں خریدیں اور آگے بیچ دیں۔

آپ کی اپنی حکومت ہے اپنے کام خود کریں

چیف جسٹس نے نیب پراسیکیوٹر سے کہا کہ الزام ثابت کرنا تو آپ کا کام ہے۔ نیب اپنے کام سپریم کورٹ سے کیوں کرانا چاہتا ہے۔ آپ کی اپنی حکومت ہے اپنے کام خود کریں۔ ہم پہلے بھی کہہ چکے ہیں کہ آپ کے کام نہیں آئیں گے۔ اگر مالک اور بے نامی دار خود کہہ رہا ہے کہ جائیداد ہماری نہیں تو نیب کے پاس کیا ثبوت ہے۔

نیب نے ملزم کی بریت کیخلاف سپریم کورٹ میں اپیل کی

واضح رہے احتساب عدالت نے محمد اقبال احمد کو 2006ء میں دس سال قید اور ایک کروڑ جرمانہ کیا تھا لیکن ہائیکورٹ نے ملزم کو بری کر دیا تھا۔ نیب نے ملزم کی بریت کیخلاف سپریم کورٹ میں اپیل کی تھی جسے عدالت عظمٰی نے مسترد کر دیا۔