پشاور۔ پاکستان دنیا کا خوس قسمت ملک ہے جسے قدرت نے آبی ذخائر کی نعمت سے نواز رکھا ہے مگر ہماری ناعاقبت اندیشی کی وجہ سے نہ صرف دریاؤں اور نہروں کی آلودگی میں خوفناک حد تک اضافہ ہو رہا ہے بلکہ اس سے آبی حیات کو بھی شدید خطرات لاحق ہو چکے ہیں۔ تازہ ترین رپورٹ میں بتایا گیا ہے کہ پنجاب کے بعد اب خیبر پختونخوا کے دریاؤں میں آلودگی بھی خطرناک سطح تک پہنچ گئی ہے۔

دریائے کابل میں 1700 اقسام کے بیٹکیریا کی موجودگی کا انکشاف

دریائے کابل میں 1700 مختلف اقسام کے بیٹکیریا کی موجودگی کا انکشاف ہوا ہے جس سے صوبہ بھر کے عوام میں گہری تشویش پائی جاتی ہے۔ آلودگی کے سبب پانی میں آکسیجن کی مقدار میں نمایاں حد تک کمی ہونے کا خدشہ ہے۔ دریاؤں میں بڑھتی ہوئی آلودگی صحت کیلئے بھی خطرناک ہے جس سے ٹائیفائیڈ، ہیپاٹائٹس، ڈائریا اور ہیضہ جیسی بیماریاں لاحق ہونے کا خدشہ بڑھ گیا ہے۔

ماہرین صحت نے خدشہ ظاہر کیا ہے کہ گندگی سے آکسیجن کی سطح 4 ملی گرام فی ایم ایل کیو سے نیچے آ سکتی ہے۔ آکسیجن کی سطح میں کمی سے آبی حیات کو بھی شدید خطرات لاحق ہو سکتے ہیں۔ ماہرین صحت نے حکومت خیبرپختونخوا کو آبی آلودگی ختم کرنے کیلئے ٹھوس اقدامات کرنے کی ضرورت پر زور دیا ہے۔